Bato-Lata

Mga himan:

1. Mga tsinelas nga Spartan
2. Lata sa Alpine
3. nataran sa balay
4. panyo (usa ra ka buok ha)

Unsaon pagdula:

Way limit ang gidaghanon sa magdula. Matag magdudula kinahanglan nga naay tsinelas. Dili ni maesplikar nganong ginganlag bato-lata nga wa man untay bato nga gamit. Matod sa panukiduki sa mga eskolar sa Harvard University, bato gyod kunoy gigamit ini sa una apan gi-improbays na lang kay daghan man kunong naospital nga naigo sa bato. Mao ni karon nga tsinelas na lay gigamit aron medyo sibilays gamay. Sugdan ang dula pinaagi sa pagmano sa usa ka taas nga badlis angtad sa gipabarogan sa lata. Ang pilde sa pagmano maoy unang mobantay sa lata. Ang ubang magdudula maningkamot nga ig-on ug tumbahon ang lata pinaagi sa paglabay sa sinelas tumong sa lata. Kon matumba ang lata, dali-dalion kinig pabarog sa bantay unya dakpon niya ang mga "dumadagan". Ang problema kay ang katuyoan sa mga "dumadagan" mao man ang pagtumba sa lata. Angayng bantayan sa bantay nga dunay limbongan ini. Inigdakop niya sa dumadagan dunay mga magdudula nga patiran ang lata kay di man siya kakita kay tua god, sige siyang gukod. Wa ra bay gyoy molaban sa bantay kay ingon ani ni kakruwel dulaa. Di man sad mahimong manakop ang bantay sa punto nga natumba ang lata. Sa laktod pagkasulti, wan agenst da world ning dulaa. Kon di ka kabawos, kuhaa ang panyo unya hilak na lang. Kon kinsay makasulti kinsay nag-imbento ining maong kruwel nga dula, palihog tawag sa 911 kay dakooooo kaayo ni siyag sala sa kalibotan. Usa na ko sa sige lag hilak ini kay wa gyod kabawos. Pasalamat pod ta sa sponsor ining dulaa, ang Alpine kay kon wa pa ning matang sa lata nga sakto gyong gamiton sa dula (sakto ra sa kadak-on), hayan di maimbento ning dulaa. Sa Spartan pod diay kay kon wa pa ning tsinelas nila nga bug-at og lig-on kaayo bisag unsaon labay, hayan bato pa roy gigamit ining dulaa ug magpadayon pa unta ang daghang naospital ining dulaa.

Inigkahuman sa dula, silhigi ang nataran aron di kasab-an sa Nanay.

labyog...
bay tomas