Syatong

Kahigalaan,
Nia sad koy bag-ong nahunahuna. Maghisgot na sad tag mga dula nga binisaya. Ang atong buhaton mao ang pagsuwat unsaon kini pagdula ug unsay mga himan nga gamiton. Akoy una, aron di ko ninyo maunhan:

Siyatong (Sa ubang dapit, Paligtiw)

Mga himan:

1. duha ka sanga sa bayabas; ang usa taas, mga tulo ka dangaw ang katas-on; ang usa mubo, usa ka dangaw ang katas-on. ang taas pagatawgog painahan ug ang mubo pagatawgog paanak.

2. darohan nga hawan labi nag bag-ong sinanggian

3. udlot sa bayabas

Unsaon pagdula:

Dula kini sa duha ka team nga adunay dili momenos lima ka sakop matag grupo. Sugdan ang dula pinaagi sa pagbalbag sa paanak gamit ang painahan. Kadtong maoy kinalayoag maabot maoy unang modula. Ang kaatbang nga grupo maningkamot nga maputol ang turno sa mga magdudula nga nagdula. Ang usa ka han-ay sa dula naglangkob sa ligwat, balbag, ug paligtiw.

ligwat:

himoon kini pinaagi sa pagbutang sa paanak nga magbabag sa bangag sa tunga sa darohan. Ligwatan. Unya saw-on sa kontra aron maputol ang set sa nagdula. Kon dili masawo, mahimo nga iyang bun-on ang painahan nga ibutang sad nga magbabag sa bangag. Kon maigo, hatagag puntos nga 10 ang team nga nagbantay. Kon dili, mopadayon ang nagdula sa sunod nga lakang nga mao ang balbag.

balbag:

himoon kini pinaagi sa pag-itsa sa paanak unya tirahan sa painahan. Saw-on gihapon sa kontra. Kon dili masawo, iitsa kining paanak ngadto sa bangag sa paagi nga duol gayod kaayo sa bangag. Ang nagdula mobalibag niini kutob sa iyang mahimo aron mapalayo ang paanak. Unya sukdon ang gilay-on pinaagi sa painahan. Ang naihap idugang sa ilang eskor. Unya mopadayon sa sunod lakang nga mao ang paligtiw.

paligtiw:

himoon kini pinaagi sa pagbutang sa paanak nga magsiwil dinha sa bangag. Tiltilon sa painahan hangtod nga molupad unya bagbagon na usab sa hangin. Maningkamot gihapon ang kontra nga ilang masawo. Kon masawo, ibalik sa sero ang eskor sa kontra. Apan kon dili masawo, ihpon ang naabot sa paanak pinaagi sa pagbalitok sa painahan.

Unya ang duwa magpadayon hangtod ang tanan nga magdudula, "mamatay" sa ilang turno sa pagdula. Mahimo lang kini kon masawo sa kontra ang paanak o kaha maigo nila ang painahan atol sa pagligwat.

Mangutana mo kon unsaon ang bayabas? Mao niy itambal kon maigo ang inyong agtang sa paanak.

Palihog sad kog tanom ini didto sa atong kalubihan, Day Nips.

bay tomas